فیلڈ مارشل عاصم منیر کا پاکستان آرڈیننس فیکٹری واہ کا دورہ
فیلڈ مارشل عاصم منیر کا پاکستان آرڈیننس فیکٹری واہ کا دورہ
راولپنڈی: چیف آف آرمی اسٹاف و چیف آف ڈیفنس فورسز (سی او اے ایس و سی ڈی ایف) فیلڈ مارشل سید عاصم منیر نے ہفتہ کو پاکستان کی سب سے بڑی دفاعی صنعتی تنصیب پاکستان آرڈیننس فیکٹری (پی او ایف) واہ کا دورہ کیا۔
آئی ایس پی آر کے مطابق دورے کے دوران پی او ایف کی پیداواری صلاحیت، برآمدی امکانات اور ملکی دفاعی صنعتی بنیاد کو مضبوط بنانے میں ادارے کے کردار کا جائزہ لیا گیا۔
فیلڈ مارشل سید عاصم منیر کو پی او ایف کے مختلف آپریشنز اور مقامی سطح پر مختلف اقسام کے فوجی سازوسامان کی تیاری و پیداوار کے ذریعے ملکی دفاع کو مضبوط بنانے میں ادارے کے کردار پر تفصیلی بریفنگ دی گئی۔
چیف آف آرمی اسٹاف و چیف آف ڈیفنس فورسز نے مقامی طور پر ڈیزائن اور تیار کیے گئے ہتھیاروں اور گولہ بارود کے ٹیسٹ اور آزمائشی مراحل کا بھی مشاہدہ کیا۔ اس موقع پر پی او ایف کی جدت، خود انحصاری اور ملکی دفاعی پیداواری صلاحیتوں میں اضافے کے عزم کو اجاگر کیا گیا۔
فیلڈ مارشل عاصم منیر کو ڈی آئی پی آر اے آرڈیننس کے نفاذ کے بعد پی او ایف کی کارپوریٹائزیشن کے عمل میں ہونے والی پیش رفت سے بھی آگاہ کیا گیا۔
انہیں مقامی سطح پر پیداوار اور صنعتی صلاحیت میں اضافے کے لیے جاری اقدامات، بالخصوص دو نئے صنعتی پلانٹس کی تنصیب کے بارے میں بھی بریفنگ دی گئی، جن سے رواں سال کے اختتام تک پیداوار شروع ہونے کا امکان ہے۔
دورے سے دفاعی شعبے میں خود انحصاری، مقامی پیداوار اور تکنیکی جدت کو فروغ دینے کے لیے پاک فوج کے عزم کی عکاسی ہوتی ہے۔
