پاکستانی فلائٹ اٹینڈنٹ جعلی کینیڈین بارڈر اسٹیمپس اسمگل کرنے کے جرم میں مجرم قرار
پاکستانی فلائٹ اٹینڈنٹ جعلی کینیڈین بارڈر اسٹیمپس اسمگل کرنے کے جرم میں مجرم قرار
ٹورنٹو: پاکستان انٹرنیشنل ایئرلائنز (پی آئی اے) کی ایک فضائی میزبان کو کینیڈین بارڈر سروسز ایجنسی (CBSA) کے دو جعلی پورٹ اسٹیمپس اسمگل کرنے کے جرم میں مجرم قرار دے دیا گیا ہے، تاہم عدالت ابھی تک یہ معلوم نہیں کر سکی کہ خاتون نے یہ جعلی اسٹیمپس اپنے سامان میں کیوں چھپا رکھے تھے۔
دی ٹورنٹو اسٹار کے مطابق 46 سالہ حنا ثانی کو 2024 میں اس وقت گرفتار کیا گیا تھا جب ان کے سامان سے کینیڈا کے بارڈر کے دو جعلی اسٹیمپس برآمد ہوئے۔
یہ اسٹیمپس کسی شخص کے کینیڈا میں داخلے اور اس بات کی تصدیق کے لیے استعمال ہوتے ہیں کہ متعلقہ شخص قانونی طور پر ملک میں داخل ہوا ہے۔
حنا ثانی نے عدالت کو بتایا کہ یہ اسٹیمپس ان اشیا میں شامل تھے جو وہ ایک جاننے والے کے لیے کینیڈا لا رہی تھیں۔ تاہم ایئرپورٹ سکیورٹی حکام مسلسل مسافروں کو خبردار کرتے ہیں کہ وہ دوسرے افراد کی اشیا اپنے سامان میں لے جانے سے گریز کریں، کیونکہ اس کے نتیجے میں قانونی پیچیدگیاں پیدا ہوسکتی ہیں۔
عدالت میں کیس کی سماعت کے دوران یہ واضح نہیں ہوسکا کہ جعلی CBSA اسٹیمپس کہاں سے حاصل کیے گئے تھے، انہیں کس مقصد کے لیے استعمال کیا جانا تھا اور اس معاملے میں کوئی وسیع تر بین الاقوامی نیٹ ورک ملوث تھا یا نہیں۔
حنا ثانی کے خلاف مقدمہ کینیڈا میں سرحدی دستاویزات اور امیگریشن نظام کے غلط استعمال سے متعلق سنگین نوعیت کا معاملہ قرار دیا جا رہا ہے۔
