نیئر حسین بخاری اور مرتضیٰ سولنگی کا نیپال کے سفارتخانے کا دورہ، صدر اور پاکستانی عوام کی جانب سے اظہار تعزیت
نیئر حسین بخاری اور مرتضیٰ سولنگی کا نیپال کے سفارتخانے کا دورہ، صدر اور پاکستانی عوام کی جانب سے اظہار تعزیت
اسلام آباد: صدرِ مملکت آصف علی زرداری کی ہدایت پر سینیٹ کے سابق چیئرمین سید نیئر حسین بخاری اور صدرِ مملکت کے ترجمان مرتضیٰ سولنگی نے اسلام آباد میں نیپال کے سفارتخانے کا دورہ کیا اور گزشتہ ہفتے چین۔نیپال سرحد کے ساتھ لینڈ سلائیڈنگ اور گلیشیئر پھٹنے کے نتیجے میں آنے والے شدید سیلاب سے ہونے والے جانی نقصان اور تباہی پر صدرِ مملکت اور پاکستانی عوام کی جانب سے دلی تعزیت اور یکجہتی کا اظہار کیا۔پیر کو ایوان صدر کے پریس ونگ سے جاری بیان کے مطابق پاکستان میں نیپال کی سفیر ریتا دھیتال نے ان کا استقبال کیا اور اس مشکل وقت میں نیپال کے ساتھ حکومتِ پاکستان اور پاکستانی عوام کی جانب سے اظہارِ یکجہتی اور تعاون پر شکریہ ادا کیا۔ سید نیئر حسین بخاری اور مرتضیٰ سولنگی نے وزیٹرز بک میں اپنے تعزیتی تاثرات درج کیے اور نیپال کے عوام کے ساتھ یکجہتی کا اظہار کیا۔
